Intermountain Healthcare and deCODE genetics kynna nýtt alþjóðlegt samstarf sem felur í sér að raðgreint verður erfðaefni úr hálfri milljón Bandaríkjamanna til að freista þess að finna áður óþekkt tengsl milli erfða og sjúkdóma.

Rannsóknin hefur fengið nafnið HerediGene Population Study. Vísindamenn frá Íslenskri efðagreiningu og Intermountain Healthcare munu rannsaka erfðaefni úr 500 þúsund einstaklingum aðallega frá Utah og Idaho í Bandaríkjunum. Kári Stefánsson forstjóri Íslenskrar erfðagreiningar segir í tilkynningu frá fyrirtækinu að vonir standi til þess að þetta einstaka samstarf geti leitt til nýrra uppgötvana og veitt nýja innsýn í erfiða sjúkdóma og þannig mögulega leitt til þess að hægt verði að þróa ný lyf í framtíðinnni. Þátttakendur í rannsókninni hafa samþykkt að vera með og eiga möguleika á því að fá að vita ef erfðarannsókn leiðir í ljós alvarlegar sjúkdómsvaldandi stökkbreytingar. 

Þetta er stærsta erfðarannsókn sinnar tegundar sem hefur verið gerð í Bandaríkjunum. Aldrei fyrr hefur erfðamengi svo margra frá einstöku svæði verið rannsakað á einu bretti.
Intermountain Healthcare í Utah er samstarf, 24 sjúkrahúsa, 160 læknastofa, Sjúkratryggingafyrirtækisins SelectHealth og 2300 annarra lækna og meðferðaraðila í Salt Lake City.
Lincoln Nadauld yfirmaður hjá Intermountain á sviði einstaklingsmiðaðra lækninga segir í tilkynningu frá fyrirtækinu að þótt sýnin komi að megninu til frá Utah muni mögulegar uppgötvanir á sviði lyfja og meðferðar gagnast allri heimsbyggðnni.

Share!